Die uitvoerende direkteur en politieke ontleder van die Instituut vir Openbare Beleidsnavorsing, Graham Hopwood, sê Mikhail Gorbatsjof, wat in die ouderdom van 91 gesterf het, was ‘n deurslaggewende figuur tydens die veranderende globale politiek van die 1980’s, en dat sy geopolitieke veranderinge ’n groot rol in Namibiese onafhanklikheid gespeel het. Gorbatsjof was die laaste Sowjet-leier en het die Koue Oorlog tot ‘n vreedsame einde gebring. Hopwood sê op eie bodem het Gorbatsjof se geopolitieke veranderinge Namibiese onafhanklikheid vergemaklik, hoewel daar ander deurslaggewende faktore was.

Twee ekstensiewe pionier-melkboere van Gobabis, Japie Engelbrecht en Hennie van Niekerk, is tydens die jaarlikse dinee en prysoorhandiging van die Suiwelprodustevereniging vereer vir hul ononderbroke bydraes tot die bedryf wat gesamentlik 94 jaar beloop. Agriforum berig die goeie nuus van hul uittrede is dat hul nasate melkproduksie gaan voortsit. Engelbrecht het 24 jaar lank as SPV-voorsitter gedien en tydens sittings van die Namibië Landbou Unie se uitvoerende raad sake en probleme van die suiwelbedryf deurdag voorgelê. Hy sê ’n hoogtepunt in sy loopbaan sou wees as hy iets vir die produsent kon beding – presies dit waarop hy hom toegespits het. Sy pa Koos het in 1960 die Kroonster-melkery begin en Engelbrecht het in 1972 toegetree. Ná ’n produksieleeftyd van ’n halfeeu roep hy nou halt om die leisels aan sy twee seuns, Koos en Japie Jr, oor te gee.

Die kleinseun van wyle oudpresident Nelson Mandela, Mandla Mandela, het Meghan Markle gekritiseer oor opmerkings wat sy in ‘n onderhoud met Cut gemaak het. Markle beweer ‘n manlike Suid-Afrikaanse lid van die Lion King se rolverdeling het aan haar gesê Suid-Afrikaners het haar huwelik met prins Harry op dieselfde manier gevier as Mandela se vrylating uit die tronk in 1990. Mandela sê sy oupa se viering het gegaan oor 350 jaar se kolonialisme en 60 jaar onder ‘n brutale apartheidsregering, daarom kan die twee nie vergelyk word nie.

Die Europese Ruimteagentskap het nuwe satellietbeelde vrygestel wat bevestig een derde van Pakistan is tans onder water. Oorstromings van rekord-afmetings wat aan klimaatsverandering toegeskryf word, het die lewens van een-duisend-100 mense geëis en 1,2-miljoen is ontwortel. Die agentskap sê die Indusrivier het sy walle oorstroom en ‘n lang meer van tientalle kilometer laat ontstaan. Die Pakistanse regering sê die skade weens die oorstromings kan sowat 168-miljard-rand beloop.

En ten slotte…  Die Namibiese dollar verhandel teen 17 dollar 30 teenoor die Amerikaanse dollar, 19 dollar 30 teenoor die pond en 17 dollar 23 teenoor die Euro. Goud verhandel teen een-duisend 699 Amerikaanse dollar 80 per Fynons en Brent ruolie verkoop teen 96 Amerikaanse dollar 53 per vat. Platinum verhandel teen 808 Amerikaanse dollar 40 en een Bitcoin verhandel teen 20 duisend 173 Amerikaanse dollar.

Kanaal 7 Nuus. Namibië en die wêreld op hierdie oomblik. Ons leef in Dankbaarheid teenoor God, ons luisteraars en ons ondersteuners. Christus bring hoop in onseker tye.